Luçiano Boçi: Protesta kombëtare më 11 Korrik për lirimin e Sali Berishës

Luçiano Boçi, një nga figurat kryesore të Partisë Demokratike, ka dhënë detaje të reja lidhur me protestën kombëtare të thirrur nga Kryesia e Partisë Demokratike. Protesta do të mbahet më 11 korrik, përballë Kryeministrisë, në orën 20:00. Boçi deklaroi se ky tubim masiv ka për qëllim të shërbejë si “një formë presioni për të liruar Sali Berishën”.

Gjatë një interviste në emisionin "Open" në News 24, Boçi u pyet nëse Partia Demokratike po përdoret për çështjet personale të Berishës me drejtësinë, gjë që ai e mohoi kategorikisht. Sipas tij, çështja personale lidhet me shpalljen "non grata" të Berishës dhe jo me procesin politik që po zhvillohet ndaj tij.

“Çështja personale konsiderohet ajo e ‘non gratës’ dhe jo procesi politik që po zhvillohet ndaj kryetarit të PD. Aq më tepër që nuk ka as fakte, është një hetim i stisur dhe masa e marrë nuk është në proporcion me hetimin apo me rastet analoge për mënyrën si vepron drejtësia," deklaroi Boçi.

Ai theksoi se një forcë politike, kur përgatitet për zgjedhje, përgatitet me lidershipin e saj dhe ky reagim është një kërkesë e përsëritur e demokratëve për kryetarin e opozitës. "Ky reagim i yni është një reagim i demokratëve, ka qenë një kërkesë e përsëritur e demokratëve për kryetarin e opozitës," shtoi ai.

Protesta e thirrur më 11 korrik pritet të mbledhë mijëra mbështetës të Partisë Demokratike, të cilët do të kërkojnë lirimin e Sali Berishës dhe do të shprehin pakënaqësinë e tyre ndaj masave të marra nga drejtësia.